Poles sos característiques, la sidra natural d’echáu tradicional pide unos curiaos mínimos nel so almacenamientu y manexu. Ha guardase nun llugar frescu, lloñe de demasiaos movimientos y vibraciones.

En cuantes qu’a la temperatura de serviciu afayadiza, qu’habrá facese en vasu, ye de 13ª a 16ª, ye dicir, fresco; n’época de calor ye aconseyable dexar la botella somorguiada n’agua fresco, de pie, quitando de que’l corchu pegue col agua. Enantes d’echalo, suel voltiase la botella, ximelgando un momentu’l so conteníu, col envís d’activar el carbónicu natural endóxeno y dilir los sedimentos, frutu d’una ellaboración ensin filtraos.

Pela so parte la Sidra Achampanao y d’Espresión Nueva requieren una temperatura de serviciu ente 6º y 8º la primera y ente 8º y 10º la segunda, col mesmu almacenax que la sidra d’echar, y adaptando’l serviciu al del vinu esplumoso (tulipa) y vinu blanco (copa) respectivamente.